Dag 3 het baie
beter gegaan, alhoewel dit self met nog nuwe uitdagings gekom het.
Die dag het
sommer afgeskop met twee periodes Wiskunde waartydens die klas hulle huiswerk
gemerk het. Ek self het vandag weereens my kennis opgeskerp toe die juffrou
hulle gevra het oor hoekom die binnehoeke van ‘n vierkant gelyk is aan 360
grade. Ek het oorspronklik nie gedink aan die feit dat dit uit twee driehoeke
bestaan nie, en interessant genoeg het nie een van die leerders ook daaraan
gedink nie.
Wat vir my baie opvallend was, was die verskillende onderrigmetodes
wat die onderwysers gebruik om hulle vakke oor te dra. Al is dit hoe
verskillend, blyk dit asof elke metode perfek werk.
Ek was ook vir
twee periodes in die diepkant ingegooi toe die een onderwyseres my vra om in
haar klasse toesig te hou, aangesien sy ander verpligtinge gehad het. Dit was
nogal intimiderend om voor daardie klas te moet staan en te weet dat dit van my
afhang oor of die klas in toom gehou gaan word of nie. Ek het veral met die een
klas baie goed oor die weg gekom, veral die feit dat ek hulle met hulle
Wiskunde opdrag kon gehelp het. Dit is ‘n verligting om te kan sê dat ek
hierdie spesifieke klas sal gebruik vir my Wiskunde les wat deur die dosent
geëvalueer gaan word. Die feit dat ek van die begin af so ‘n goeie verhouding
met die klas kan vorm gaan help met tweerigting kommunikasie tydens my les.
Daar is vir ons
gesê om nie te vriendelik te wees met die leerders nie, want dan loop hulle oor
jou en het geen respek vir jou nie, maar hulle het ook gesê ons moet onsself
wees. En ek kan nie sonder ‘n glimlag iemand groet nie, so ek is dalk te
vriendelik, maar tog glo ek die leerders waardeer dit meer as ‘n onderwyser wat
ontoeganklik vir die leerders is.
No comments:
Post a Comment